Meg minnist: Pætur Rasmussen (1:4)

10-01-2021

Jógvan Arge hittir Pætur Rasmussan á Skála. Fyrsta sending

Gestur í Meg minnist er 73 ára gamli Pætur Rasmussen á Skála. Eftir 48 ár í flogvinnu er hann givin. Hann byrjaði sum avgreiðslumaður fyri tyrlur norðuri í Upernavik í 1972 og gavst nú á Atlantsflog eftir 18 ár í Føroyum.

Hetta hevur verið eitt spennandi lív, sum hevur ført hann runt um í Grønlandi og heiminum annars. Pætur er føddur á Skála í 1947. Pápi hansara, Gunnar Rasmussen, var haðani. Mamman, Jenny Aaagaard, f. Nielsen, er ættað úr Vestmanna.

Tá Pætur hevði fingið realprógv í Runavík, fór hann í skrivstovulæru. Í 1970 fór hann til Danmarkar og í 1972 til Grønlands, har hann byrjaði í starvi hjá KGH í Upernavik.

Meg minnist

Sendirøðin Meg minnist byrjaði í 2009. Í røðini leggur Jógvan Arge dent á at fáa fólk at siga frá slíkum, sum tey vita og hava upplivað. Sjálvt heitið á sendirøðini er ikki nýtt. Niels Juel Arge brúkti navnið í mong ár til sínar samrøðusendingar, og Jógvan ásannar, at ringt er at finna eitt betri felagsheiti fyri slíkar sendingar.