- Tíðindi, mentan og ítróttur
Kim Jong-un letur heilsa úr Norðurkorea
Norðurkoreanski leiðarin Kim Jong-un er komin til Russlands at fundast við Vladimir Putin.
Kim Jong-un hevur ferðast við toki til Vladivostok, sum liggur har eysturi í Russlandi við Kyrra Havið.
Á ferðini til Vladivostok steðgaði tokið í býnum Khasan. Tá fekk ein russiskur sjónvarpsmaður orðið á Kim Jong-un.
"Eg eri komin til Russlands við inniligum heilsanum frá mínum fólki. Eins og eg havi sagt, so vóni eg, at hendan vitjanin fer at eydnast væl, at okkurt kemur burturúr, og at eg á fundi við kæra forsetan Putin kann umrøða serliga spurningin um at loysa trupulleikarnar á koreansku hálvoynni og at menna sambandið millum bæði londini."
Hasa umsetingina hava vit frá AP tíðindastovuni.
Báðir stjórnarleiðararnir hittast ímorgin.
Leiðararnir fara væntandi at umrøða íkomnu støðuna, nú stígur er komin í samráðingarnar við amerikanska forsetan.
Donald Trump og Kim Jong-un hittust í Hanoi í Vietnam fyrr í ár at tingast um ætlanina hjá Norðurkorea við kjarnuorkuvápnum, men tann fundurin endaði uttan semju.
Filmsbrotið hava vit fingið frá Associated Press.