Jóan Pauli flennir at føroyingum - úr Argentina

Uppskriftir á Facebook, offshore-typan, kærleikin til Ísrael, gerandisrasisma og bensinstøðin í Skálafirði. Millum lítið og einki sleppur undan viðgerð frá teimum báðum Bjarna Arge og Jóan Paula Dahl Jakobsen.

Teir flenna, perspektivera og viðgera serføroysk fyribrigdi, tey lítlu gerandistingini og tey stóru politisku málini.

Undirtøkan er eisini góð. Hvør partur verður stroymdur fleiri túsund ferðir og nógv av tí teir siga er blivið partur av gerandismálinum. Flestu vita nú hvør offshore-typan er og at Føroyar ikki eru verðin, men í verðini.

Vit hava havt eitt longri prát við annan teirra, Jóan Paula Dahl Jakobsen. Vit spyrja hann millum annað hví teir byrjaðu podcastin og um teir sjálvir meta, at tað er eitt týdningarmikið arbeiði teir gera.