Sonur løgtingsformannin á kinesiskum lista

164 føroyingar eru skrásettir í kinesiska dátugrunninum, Overseas Key Information Database, sum KT-fyritøkan Zhenhua hevur gjørt.

Á listanum eru upplýsingar um fólk, sum tað fyri tað mesta ber til at finna fram á internetinum. Tað eru serliga føroyskir politikkarar og vinnulívsfólk, ið kunnu metast at hava ávíst vald í Føroyum, men eisini avvarandi teirra.

Listin, sum Kringvarpið hevur fingið fatur í, varð seinast dagførdur í 2018. Tað hevur ikki eydnast teldufrøðingum at endurskapa øll nøvnini í dátabasanum. Tí verður roknað við, at tað eru fleiri enn teir 164 føroyingar í dátabasanum.