Ítrótturin skal fáa frið

Í vár kom danska skattamálaráðið við frágreiðing, sum vísir, at í fjør høvdu umleið 480.000 fólk í Danmark trupulleikar við pengaspæli.

Hetta er ein tvífalding samanborið við 2016. Eisini vísir kanning hjá greiningarstovninum, Kantar Gallup Adfacts, at um somu tíð eru nógv fleiri lýsingar fyri pengaspøl, at síggja.

Eingi tøl eru fyri, hvussu nógv fólk í Føroyum hava trupulleikar við pengaspæli.

Men formaðurin í smápartafelagnum Ítróttavedding, sum er felag hjá landsstýrinum, Ítróttasambandi Føroya og Føroya Ungdómsráð, heldur uppskotið hjá donsku stjórnini verða skilagott.

Í Føroyum býtir smápartafelagið Ítróttavedding - peningin, sum føroyingar hava spælt fyri hjá Danske Spil, og sum kemur aftur til Føroya frá Dansk Tipstjeneste. Í fjør var samlaða upphæddin góðar 15 milliónir og 600 tusund krónur.