Umhugsa at útseta skurðviðgerðir í Klaksvík

Jákup Petersen ortopædiskur yvirlækni á Klaksvíkar Sjúkrahúsi, sigur, at útgerðin, sum brúkt verður til sóttreinsan av amboðum,  er vánalig, og tólini sum brúkt verða at doyva sjúklingar hava leingi verið í sera ringum standi.

Men nú eru tey oyðiløgd av vatnskaða, og tí ber slett ikki til at doyva sjúklingar, sigur Jákup Petersen.  

Tað hevur ikki verið gjørligt at skurðviðgjørt fólk, meðan Klaksvíkar Sjúkrahús hevur verið umvælt, og tí standa 35-40 fólk í løtuni á bíðilista til millum annað at skifta knø og liðir.

Umhugsa at útseta skurðviðgerðir

Jákup Petersen sigur, at hann fleiri ferðir hevur gjørt vart við, at neyðugt er við nýggjari útgerð, men higartil er onki hent.

Hann heldur, at ein trupulleiki er vantandi samskipan av útgerð og vantandi læknalig leiðsla á sjúkrahúsinum.

Arbeitt verður í løtuni við at fáa til vega doyvingartól. Men eyðnast hetta ikki skjótt, mugu skurðviðgerðirnar útsetast, sigur Jákup Petersen.