- Tíðindi, mentan og ítróttur
Nón
Stutt eftir at farna øld var komin í helvt tóku seks lond stig til at stovna felagsskapin, sum vit í dag kenna sum ES ella Europeiska Samveldið. Og júst hendan týsdagin skal Undirhúsið í Westminster atkvøða um eina skilnaðaravtalu, nú Bretland fer úr ES.
Hesin tematýsdagurin hevur tí ES og Brexit sum evni. Vit taka pulsin í enska høvuðsstaðnum, ES-høvuðsstaðnum og í skotska høvuðsstaðnum. Áki Johansen er føroyskur sendimaður í London; Elin Mortensen starvast sum sendikvinna í Bruxelles; og Brynhild Weihe lesur løgfrøði í Edinburgh.
Hvat var endamálið Evropasamveldinum, hvussu hevur hilnast og hvør verður framtíðin. Vit perspektivera, tá Hans Andrias Sølvará, søgufrøðingur, kemur á gátt.
Kate Sanderson hevur starvast sum føroysk sendikvinna í Bruxelles farnu árini. Vit spyrja hana um sambandið millum Føroyar og ES.
Hvørjar eru vánirnar, nú Undirhúsið tekur støðu til Brexit, og hvat merkir hetta fyri føroyingar? Hesar og aðrar spurningar seta vit Hallu Nolsøe Poulsen, ið er forkvinna í føroyska Brexitbólkinum.
Jógvan Skorheim úr Sjálvstýri og Bjarni Hammer úr Javnaðarflokkinum eru farnir til London í samband við Brexitatkvøðugreiðsluna í Westminster. Vit spyrja, hvat teir vænta at fáa burturúr.
Eitt samt løgting tók undir við at Føroyar skuldi veri uttanfyri EEC, sum ES nevndist tá. Men hvat halda føroyskir politikkarar í dag? Orðaskifti millum Sjúrð Skaale, fólkatingsmann fyri Javnaðarflokkin, og Hanus Samró, skrivara í Fólkaflokkinum.
Tematýsdagurin um ES kann hoyrast her.