Børn skulu ikki fáa hjálp til alt

16-01-2019

Børn í dag verða borin, koyrd og fáa hjálp til alt. Tað ger, at tey eru illa fyri motoriskt, og tað hevur avleiðingar.

Alt ov nógv børn í Føroyum eru motoriskt illa fyri.

Hetta er nakað, sum eitt nú námsfrøðingar, lærarar, hjálparfólk og heilsusystrar síggja í sínum arbeiðsdegi.

- Tað er ikki óvanligt at síggja børn, sum ikki duga til dømis at ganga í trappum ella klára at traðka upp á ein høgan kantstein.

Soleiðis sigur Linda av Fløtum, námsføðingur, sum júst er úbúgvin motorikkvegleiðari. Hon er millum tey 26 fólkini, sum í eitt ár hava nomið sær hesa útbúgvingina.

Tað er Guðrun Horn, sum hevur fingið henda útbúgvingarmøguleikan til Føroya. Sambært henni eru tað alt ov nógv børn, sum ikki eru nóg væl fyri motoriskt:

- Børn í dag sita ov nógv og røra seg sum heild alt ov lítið. Tey hava brúkt fyri at hoppa, klatra og brúka kroppin, soleiðis at kroppurin fær avbjóðingar og á tann hátt kann mennast motoriskt, sigur Guðrun Horn.

Í morgunsendingini greiddu Linda av Fløtum, Annika Østerø og Guðrun Horn frá trupulleikanum av, at børn ikki eru nóg væl fyri motoriskt.

Góðan morgun Føroyar

Góðan morgun Føroyar er á skránni gerandismorgnar frá klokkan 7:35 til 9:50. Sendingin loftar aktuellum evnum, hevur fastar tættir og leggur upp til interaktivitet. Alt er kryddað við tónleiki, nýggjum og eldri. Samband: gmf@kvf.fo, telefonnummar +298 347500 Góðan morgun Føroyar á Facebook (letur upp í nýggjum kaga)