- Tíðindi, mentan og ítróttur
Trummudansur, synthesizarar og danskarahatur
Í kvøld og annaðkvøld fer ein nýggjur bólkur, sum nevnist "Resterne af Rigsfællesskabet", at hava konsertir í Perluni í Havn og Tøting í Gøtu. Teir, ið manna bólkin, eru føroyski Heðin Ziska Davidsen, Jesper Pedersen úr Danmark og Miké Thomsen úr Grønlandi. Hetta er improviseraður tónleikur við sonevndum "modularsynthum", t.v.s. synthesizarum, har man so at siga byggir sítt egna ljóð. Tað eru Jesper og Heðin, sum taka sær av synth-partinum, meðan Miké spælir grønlendska trummu og leggur rødd til. Spurdur um, hvørt bólkurin hevur ein politiskan boðskap, svarar Heðin, at tað hava teir tilvitað ikki. Heldur er tað so, at lurtarin sjálvur skal reflektera yvir ríkisfelagsskapin gjøgnum tónleikin hjá hesum trimum umboðunum fyri ríkisfelagsskapin. - Vit eru sum tríggjar oyggjar, sum spæla saman, sigur Heðin. Jesper leggur afturat, at teir taka atlit til hvønn annan, tí ríkisfelagsskapurin er jú, sum orðið sigur, ein felagsskapur, har allir tríggir partar í prinsippinum eru á jøvnum føti. Spurningin, um hann heldur, at Grønland skal verða sjálvstøðugt, svarar Miké heldur ógreitt upp á. - Tað skal verða í samstarvi við onnur lond, og vónandi kann Grønland halda fram at samstarva við Danmark, um Grønland skuldi loyst, heldur Miké. Men hann dylir ikki fyri, at í Grønlandi er eitt umfatandi danskarahatur. - Fólk siga ofta "skide danskere", sigur Miké og leggur afturat, at hann ynskir meiri virðing í Ríkisfelagsskapinum, sum gongur báðar vegir
Tak niður