- Hetta er ein fiktionaliserað útgáva av Havnini, men tittulin er eisini ein tilsiping til leysasøgur, sigur Jón Thorsteinsson.

Havnin er karmurin um søgurnar í nýggja stuttsøgusavninum hjá Jón Thorsteinssyni: Søgur úr býnum. Hann brúkar hvørki staðarnøvn ella bygningar, men hann hevur fingið íblástur frá heilt ítøkiligum støðum, sum fólk møguliga kenna aftur.

Har er ein ørgrynna av persónum í bókini. Høg og lág. Fólk, sum flóta omaná, og fólk, sum eru dottin niður ímillum. Fólk, sum ikki kenna hvønn annan frammanundan og koma í hóslag við hvønn annan. Vegir krossast. Tilvildarliga. Og onkrir persónar ganga aftur í fleiri stuttsøgum, sum kortini kunnu lesast púra leysar av hvørjari aðrari.

- Eitt nokk so stórt evni í bókini eru viðurskiftini millum mann og kvinnu í ymsum brigdum - bæði tá tað gongur hampuliga væl, og tá tað er farið á glið. Eitt annað evni eru ymsir lívsstílar og sosialir munir millum fólk. Men so eru eisini meira álvarslig og dapur evni, so sum disfunktionalitetur, alkoholmisnýtsla, neyðtøka og harðskapur, sigur Jón Thorsteinsson.

Hetta er fyrsta bókin hjá Jón, sum tó hevur havt stuttsøgur í bæði Vencli og Varðanum. Hoyr samrøðu við Jón her.