Meg minnist: Absalon Absalonsen (3:3)

08-12-2019

Jógvan Arge hittir Absalon Absalonsen úr Vági. 3. og seinasta sending

Í 1968 hevði Borgin eina ringa ferð heim av Kappanum. Teir komu í ódnarveður og oljan gekk undan, so teir noyddust at seta inn á Reykjavík.

Fyrst í 70unum áttu Absalon og Heri Hjelm ídnaðartrolaran Bjarnoy. Ætlanin var síðani at byggja trolaran Vágbing um til rækjur, men eitt tilboð kom úr Svøríki um ein nýggjan skrokk, sum tikið varð av.

Skrokkurin stóð eitt ár á Skála, tí veðhald fekst ikki fyri byggiláninum av politiskum ávum. Jákup í Lopra keypti seinni Svalbard.

Absalon helt fram á sjónum við bæði føroyskum og útlendskum skipum. Seinastu árini á sjónum var hann við hollendskum vaktarskipum í Norðsjónum.

Meg minnist

Sendirøðin Meg minnist byrjaði í 2009. Í røðini leggur Jógvan Arge dent á at fáa fólk at siga frá slíkum, sum tey vita og hava upplivað. Sjálvt heitið á sendirøðini er ikki nýtt. Niels Juel Arge brúkti navnið í mong ár til sínar samrøðusendingar, og Jógvan ásannar, at ringt er at finna eitt betri felagsheiti fyri slíkar sendingar.