- Tíðindi, mentan og ítróttur
Nón
Leygardagin verður fyrsta undanumfarið av trimum í tónleikakappingin Sement.
Sement, sum byrjaði í 2010, hevur í stóran mun verið fyri nýggjar tónleikarar ella bólkar, sum ikki hava givið nakað út áður. Men kappingin er broytt eitt sindur gjøgnum tíðina, og seinastu árini hava bæði royndir og óroyndir tónleikarar í øllum aldri kunna tekna seg til kappingina. Einasta treyt er, at bólkarnir ikki hava vunnið kappingina áður.
Tað er fyrsta árið at Reinsaríið skipar fyri Sement, øll hini árini hevur tað verið Margaruinfabrikkin, sum hevur staðið á odda fyri kappingini. Smáar broytingar eru gjørdar, millum annað vinnur ikki bara nummar 1, men eisini nummar 2 og 3 tíð í upptøkuhøli við teknikkara. Kanska tí er luttøkan sera góð í ár - 19 bólkar hava teknað seg til kappingina.
Vit tosa í hesi sendingini við fyriskipararnar av Sement - um kappingina, og um venjingarumstøður í Havn hjá tónleikarum. Eisini práta vit Bjørk Sigurdsdóttir Lamhauge, oddakvinnuna í Brimhvítt, ein av spildurnýggju bólkunum, sum luttaka á Sement, og so fáa vit oman á Margarinfabrikkina. Tí Margarinfabrikkin hevur góðar umstøður til børn og ung at spæla tónleik og hevur ein stóran leiklut í at menna ungar tónleikarar, men seinastu árini eru tónleikaumstøðurnar har broyttar eitt sindur.