Føroya Tele-stjórin: "Vórðu ikki trýst at velja Ericsson"

19.08.2021 - 20:06

Innlendis›Tøkni

Jan Ziskasen, samtaksstjóri í Føroya Tele, vísir aftur, at Føroya Tele varð trýst av politiska myndugleikanum til at vraka Huawei sum veitara av 5g-netinum

Uni L. Hansen

John Johannessen

Aktivera javascript

Jan Ziskasen, samtaksstjóri í Føroya Tele, ásannar, at tað hevur verið trupult at verið mitt í stórpolitiska brennideplinum í sambandi við vali av veitara til 5G-netið

Mynd: Bjarni Árting Rubeksen

Ericsson verður veitari av 5g-netinum hjá Føroya Tele.'

Tað varð kunngjørt á tíðindafundi í dag.

Harvið er eitt eldfimt politiskt mál eisini loyst, tí 5g-netið hjá Føroya Tele bleiv í 2019 eitt trygdarpolitiskt stórmál, sum gjørdi, at Føroyar og landsstýrið brádliga kom í kløtur millum Kina øðrumegin og USA og Danmark hinumegin.

USA ákærdi Kina fyri at brúka Huawei til at njósnast móti vesturheiminum, meðan Kina legði trýst á sjálv eitt lítið land sum Føroya fyri at fáa landið at velja Huawei-tøkni til 5g-netið.

Og amerikanska sendikvinnan í Danmark, Carla Sands, lat ongan iva vera um, at tað kundi fáa avleiðingar fyri Føroyar, um føroya tele valdi Huawei sum veitara av sínum 5g-neti, tá hon vitjaði í Føroyum í juli í fjør.

Bylgjurnar gingu høgt í bæði landsstýrinum og á Føroya Tele, men nú er stormurin hæsaður av, tí tað verður Ericsson, og ikki Huawei, sum verður veitari av 5g-netinum hjá Føroya tele.