Hóast tað ikki eru alarmerandi nógv, sum eru smittað júst nú, so eru tey, sum arbeiða á koronudeildini, longu undir trýsti.

Bara fyri at henda deildin skal eksistera krevst, at sjúkrarøktarfrøðingar verða tiknir av øðrum deildum. Harafturat kann ein sjúkrarøktarfrøðingur á koronudeildini ikki vera um eins nógvar sjúklingar sum vanligt, tí at taka sær av koronusjúklingum er sera krevnjandi. Bara at lata seg í og úr verndarútgerðini tekur tíð.

Rannvá Hansen og Gunnrið Joensen eru sjúkrarøktarfrøðingar og starvast á koronudeildini á Landssjúkrahúsinum. Vanliga arbeiða tær á hjarta- og lungadeildini B8.

Koronudeildin var ikki meir enn pakkað niður, tá aftur var brúk fyri deildini, tí triðja bylgja av koronu av álvara breyt út í seinnu helvt av oktober mánaði.

- Hetta er upp á nógvar mátar strævið, tí bara at hava deildina opna krevur eini 10 starvsfólk. Og tað merkir, at starvsfólk mugu takast av øðrum deildum, fyri at kunna manna koronudeildina, siga Rannvá Hansen og Gunnrið Joensen.

- Vit arbeiða nógv yvir og taka eyka vaktir fyri at fáa koronudeildina at hanga saman, sigur Rannvá Hansen.

Hesa tíðina, tær hava arbeitt á koronudeildini, hava tær sæð nógvar ymiskar sjúklingar.

- Tey, sum verða innløgd, hava aloftast tørv á hjálp við at fáa luft. Vit hava havt fólk, sum eru 18 ár og heilt upp í eini 100 ár, men vit síggja greitt, at tað eru tey, sum ikki eru koppsett, sum blíva harðast rakt, sigur Gunnrið Joensen og heldur fram:

- Eg eri ikki bangin fyri koronu, men tá mann hevur sæð tað, sum vit síggja her, so fær mann veruliga virðing fyri einum slíkum virus, sigur Gunnrið Joensen.

Morgunsendingin vitjaði á koronudeildini tann 30.november 2021.