- Tíðindi, mentan og ítróttur
Góðan morgun Føroyar
Á Skála eru nógvar familjur raktar av koronu.
Fyrr í vikuni vóru bara níggju næmingar í Skála skúla. Vanliga er talið 75.
- Ómetaliga nógv eru sjúk, og so eru tað eisini tey, sum sita í sóttarhaldi, tí onkur í húsinum hevur koronu, sigur Nomi Jacobsen, sum er skúlaleiðari í Skála skúla.
Við so fáum næmingum ber illa til at halda seg til vanligu tímatalvurnar.
- Tað hava vit prøvað, og tað riggaði ikki serliga væl, so vit hava gjørt ymiskt annað. Eitt nú hava vit býtt okkum í bólkar. Nøkur hava sitið og seymað innkeypsposar úr gardinum, meðan onnur hava hjálpt til við at pakka vøru í handlinum og síðani borið tað út í húsini, har tey hava koronu og ikki sleppa til handils, fortelur Nomi Jacobsen.
Av tí at ein so stórur partur av bygdini er sjúkur júst nú, roknar Nomi Jacobsen við, at næsta vika fer at verða meira vanlig, tí tá kunnu tey flestu koma út aftur.