Espersen: Líkist ongum at krevja nakað afturfyri

- Eg eri bæði ovfarin og eitt sindur skelkaður av, at føroyskir politikarar krevja nakað afturfyri, at ein radari verður settur upp í Føroyum, sigur Søren Espersen.

Fólkafloksumboðini Jacob Vestergaard og Elsebeth Mercedis Gunnleygsdóttur søgdu í gjár, at Føroyar eiga at krevja nakað afturfyri, um radari skal byggjast í Føroyum.

- Eg haldi ikki, at vit glaðbeint skulu siga ja til ein radara í Føroyum, tí tað eru ikki føroyingar, sum hava brúk fyri einum radara, segði Jacob Vestergaard.

Bárður á Steig Nielsen, løgmaður, segði í útvarpstíðindunum í gjárkvøldið, at tað kemur ikki upp á tal, at Føroyar fara at seta sum krav at fáa nakað aftufyri, tildømis eina fríhandilsavtalu, fyri at seta radara upp í Føroyum.

Trygdarpolitikkur er ikki ein søluvøra, segði hann, men legði afturat, at við at vísa vælvild og samstarvshuga kunnu møguleikar, eisini handilsmøguleikar, stinga seg upp.

Vit hava roynt at fingið eina viðmerking frá danska verjumálaráðharranum, Trine Bramsen, men tað hevur ikki eydnast.