Ruth gevur røðu rís og rós

Forkvinnan í Framsókn, Ruth Vang, rósar pørtum av ólavsøkurøðuni hjá Bárði á Steig Nielsen, løgmanni, og millum annað fegnast hon um, at barsilsgjaldið skal hækka og at ein langtíðarætlan skal leggjast fyri bústovnar kring landið.

Eisini hóvar henni væl, at løgmaður leggur seg á somu leið sum Framsókn, tá ið talan er um gongd í haga, sum eftir hennara tykki er eitt átrokandi mál, ið má loysast.

Men Ruth Vang er samstundis troytt av enn einaferð at skula hoyra um viðgerðartrygdina, og hon stúrir fyri, hvat Bárður á Steig Nielsen meinar við, tá ið hann tosar um, at Føroyar skulu seta sær trygdarpolitisk mál.

Tingfundur verður týsdagin, og tá fer Løgtingið at umrøða ólavsøkurøðuna hjá løgmanni.