Tað snýr seg um at hava rætta hugburðin til tónleikin

Bólkurin Exit Light sá dagsins ljós í fjør, tá tað vóru 30 ár síðani, útgávan "Black Album" hjá Metallica kom út. Í tí sambandi framførdi bólkurin alla útgávuna á konsert í Perluni i Havn. Umframt tað trein bólkurin á pall á Summarfestivalinum í Klaksvík í ár. Eftirsum teir hava fingið góða móttøku, fara Exit Light aftur á pall nú um vikuskiftið. Teir spæla í Perluni í Havn fríggjakvøldið og leygarkvøldið, bæði kvøldini kl. 22. Til hesar konsertirnar spæla teir tónleik hjá Metallica, sum varð givin út í árunum frá 1983 til 1991. Gittaristar eru Pauli Reinert Poulsen og Benjamin Petersen. Spurdir um, hvat krevst til at spæla hendan tónleikin, svara báðir, at tað sjálvandi er týdningarmikið at hava røttu útgerðina og at venja serliga gittarteknikkin til løgini. Men tað týdningarmesta er at hava rætta hugburðin til tónleikin, so man finnur "djórið" fram í sær sjálvum. Hinir, ið manna Exit Light eru: Heri Reynheim bass, Sigurd Justinussen trummur og Hans Hammer sang. Vikuskiftissendingin var á gátt í Perluni og hitti Paula og Benjamin til eitt gittarprát. Hendan samrøðan er ein longri útgáva enn tann, sum var at hoyra í útvarpinum.