Havnirnar mugu vera við til at bøta um trygdina

Tað er ongin ivi um, at tað er eitt greitt ynski í vinnuni at bøta um trygdarviðurskiftini hjá fiskiskipum, sum liggja við bryggju, so vit sleppa undan fleiri vanlukkum, har menn detta niðurímillum og drukna. Tí ivast Jógvan Tróndarson, skipari onga løtu í.

Í Degi og Viku fríggjakvøldið greiddi Anfinnur Garðalíð, sum eisini er formaður í Skipara- og Navigatørfelagnum, frá, um hendingina, tá beiggi hansara druknaði við Eystaru Bryggju í Havn í summar. Og fyri einari viku síðani druknaði ein pólendingur við Eystaru Bryggju, tá hann datt niður ímillum skipið og bryggjuna.

Hans Johannes á Brúgv, stjóri í Sjóvinnurstýrinum, heldur, at tað er neyðugt við einari hugburðsbroyting víðvikjandi trygdini umborð á fiskiskipum.

Men skulu vit koma á mál við einari null hugsjón, so mugu havnamyndugleikarnir eisini upp í leikin, heldur Jógvan Tróndarson, sum er skipari í Grønlandi. Hann heldur, at havnirnar eiga at útvega tryggar landgongir til tey smærru skipini, sum ikki hava so góðan møguleika at hava slíkar umborð.