- Tíðindi, mentan og ítróttur
Vikugesturin

Tað untist bara Jóhan Christiansen at fáa átta mánaðir í sessinum sum landsstýrismaður í fiskivinnu- og samferðslumálum. Og hann heldur, at løgmaður breyt allar mannagongdir við at gera so skjótt av, tá ið hann smalkaði miðfyrisitingina. Hóast hann finst at løgmanni fyri at bera alt ov skjótt at, tá ið hann fylgdi nýskipanarbólkinum og minkaði miðfyrisitingina við trimum aðalráðum - og harvið segði Jóhan Christiansen úr starvi - so er hann glaður fyri ta tíðina, hann slapp at vera landsstýrismaður.
Jóhan Christiansen er leirvíkingur - við stórum L, sum hann málber seg - og hann býr í somu húsunum, sum hann vaks upp í. Hann er bachelor í stjórnmálafrøði, men hann sigur sjálvur, at hann er alt ov friðleysur, til at sita á skúlabonki. Sum borgarstjóri í Eysturkommunu í 12 ár, staðfestir hann, at samanleggingin er eini stór succes. Hóast hann mest sum bara hevur havt størv, sum krevja at hann er nógv millum fólk, sum hann ikki kennir, so er hann innvendur. Orkuna finnur hann við at taka sær av seyðahundum.

Vikugesturin
Vikugesturin er gestur í Vikuni hvønn leygardag. Vikugesturin er ein persónur, sum á onkran hátt er áhugaverdur beint nú. Vit taka støði í tí, sum er aktuelt, men vit fara eisini aftur um persónin og lýsa síður, sum annars ikki eru kendar. Spurningarnir kunnu bæði vera hvassir og kínandi. Tónin er kerligur og kontantur.











