NiviNaja

Spenningsjólakalendari til størri børn
NiviNaja er nýggjur jólakalendari í útvarpinum. Alt tilfarið er føroyskt heilt frá handriti til tónleik og ljóðmynd. Heili 23 leikarar eru við í spennandi søguni, sum vit fara at hoyra hvønn einasta gerandismorgun í desember
Útvarpið bjóðar størri børnum ein spildurnýggjan og spennandi jólakalendara í desember, sum eitur NiviNaja. Høvuðspersónur er Naja. Ein genta, sum at síggja til hevur alt. Hon er góður svimjari, býr í flottum húsum og hon eigur labradorin, Baldur. Men Naja hevur tað kortini ikki so lætt.
Leikurin er spennandi, kensluligur og viðkomandi. Søgan gongur fyri seg í dag í Havn og er spenningsdrama. Álvarsom evni verða tikin upp, og alt er ikki, sum tað sær út. Tað eru ikki øll, sum hava tað so gott, og kanska serliga á jólum merkjast trupulleikarnir enn størri. Og hetta er støðan hjá høvuðspersóninum, Naju. Í ársins hugnaligastu høgtíð verða vit í jólakalendaranum mint á, at vit mugu læra okkum at hyggja aftur um fasaduna, at hugsa um okkara medmenniskju og at hava umsorgan fyri hvørjum øðrum.
Jólakalendarin 2014 er føroyskt framleiddur allur, sum hann er. Elin á Rógvi hevur skrivað leikin og sangtekstirnar. Greta Svabo Bech, Benjamin Petersen, Anna Katrin Egilstrøð og Niclas Johannesen hava gjørt løgini. Løgini hjá Niclasi syngja Malan Thomsen, Lena Andersen og Kim Hansen. Hvør tóni er føroyskt framleiddur júst til hendan jólakalendaran. Finnur Hansen hevur gjørt ljóðmyndina og lagt tónleikin tilrættis.