Leygardagin 26. apríl í 1986 hendi størsta kjarnorkuvanlukkan í søguni, tá reaktorur nummar 4 í kjarnorkuverkinum í Tjernobyl í Ukraina sprongdist. Við spreingingini spjaddust sera nógv dálkandi, geislavirkin evni við vindi og regni serliga í Ukraina og til grannalondini, men sum heild til alt Evropa.

Samanlagt 336.000 fólk vóru burturflutt aftaná vanlukkuna, og mett verður at fleiri túsund, onkur halda upp ímóti 200.000, fólk eru deyð ella fara at doyggja av krabba, sum fylgja av vanlukkuni.

Tónaskaldið Sunleif Rasmussen arbeiðir í løtuni við sínari fyrstu klaverkonsert, og grundarlagið undir henni er kjarnorkuvanlukkan í Tjernobyl. Talan verður um eina serstaka konsert við bæði ljóðið og myndaupptøkum.

Síðst í oktober í ár var Sunleif Rasmussen, saman við fotografunum Hans Peturi Hansen og Rúna Friis Kjær og ljóðtøkninginum Finnuri Hansen í Tjernobyl og grannabýnum Pripjat í Ukraina. Har gjørdu teir filmsupptøkur og tóku ljóð upp av millum annað gomlum, brotnum og ófullfíggjaðum klaverum í leivdunum av bygningunum, sum vóru tømdir, aftaná kjarnorkuvanlukkuna.

Túrurin var ein heilt serstøk uppliving, sum hevur sett seg fast í minnið, eru teir allir samdir um.

Lurtið eftir samrøðuni við Sunleif Rasmussen, Hans Petur Hansen, Rúna Friis Kjær og Finnur Hansen, har teir greiða frá um serstaka túrin.

Niðanfyri síggjast myndir, sum Hans Petur Hansen og Rúni Friis Kjær tóku í Tjernobyl og Pripjat: