– Kanska skuldi eg útskrivað eina kapping, har tann, sum hevur besta boðið, kann vinna eina bók - og tríggjar Underbergarar.

Tóroddur Poulsen vil ikki avdúka, hvat hann leggur í heitið Fyribilsni, sum er tittulin á hansara nýggja yrkingasavni.

Fyribilsni er ein samanrenning millum hjáorðið "fyribils" og navnorðið "bilsni". Eitt týpiskt Tóroddskt orðaspæl, sum kanska leggur upp til at undrast eina løtu. Men hann hevur lovað sær sjálvum einki at avdúka, fyrr enn eini 100 boð eru komin inn, sigur hann.

Í yrkingasavninum er Tóroddur í góðum formi. Hann yrkir um veðrið, um dreymar, um at skriva, um barndómsminnir og longsul, og so fyllir deyðin rættiliga fitt. Sjálvur sigur hann seg vera illa fyri fyri tíðina, tí hann er koppsettur fyri korona. Tíverri fær hann ikki sama uppmerksemi um tað sum Carli, sigur hann eitt sindur speirekandi við okkum eftir samrøðuna.

Hinvegin dámar honum einki orðið spei um sínar yrkingar.

– Fleiri ummælarar hava sagt, at mínar yrkingar eru spei. Tað eru tær ikki. Tær kunnu vera ironiskar, men tað er nakað heilt annað.

Hoyr alla samrøðuna við Tórodd Poulsen her.