Hósdagin í síðstu viku varð kunngjørt, at Marjun Syderbø Kjelnæs er í uppskoti til barna- og ungdómsbókmentavirðisløn Norðurlandaráðsins fyri ungdómsbókina "Sum rótskot". 

Marjun er millum virknastu rithøvundum í Føroyum, og hevur vunnið fleiri heiðurslønir.

Hon er útbúgvin sjúkrarøktarfrøðingur, og skrivaði sína fyrstu stuttsøgu, "Russiskur dansur", í 2000. Eftir at hava fingið 3 ára starvsløn frá Mentannargrunni Landsins í 2009, tók Marjun avgerð um at gerast fulltíðar rithøvundur.

Hon vísur á, at leiðin at gerast rithøvundur hevur verið sera áhugaverd, og sum sjálvlærdur rithøvundur er neyðugt at vilja læra og at leita sær íblástur og hjálp. "Og so er tað týdningarmikið at trúgva uppá egnar førleikar og skrivihátt, eitt nú tá tú fært kritikk", vísur Marjun á. Hon fekk sjálv kritiskt ummæli av sínum fyrsta stuttsøgusavni "Ein farri av kolvetni" frá 2004. Hetta fekk hana ivast í, um hon hevði hug til at geva sínar tekstir alment út .- og harvið eisini leggja teir út til metingar. Men hon helt áfram. "Kritikkur er neyðugur fyri at menna seg sum rithøvundur, men eitt ummæli er bert er ein persónlig meting hjá ummælaranum, og eigur ikki at køva trúnna á egnar førleikar og egnan stíl", sigur Marjun.

Lurtið eftir samrøðuni við Marjuna um tilnevningina og leið hennara sum rithøvundur.