– Eg trívist sera væl, mær dámar veðurlagið, hóast tað kundi verið heitari hesa tíðina. Mær dámar fólkið, og eftir at eg var í Føroyum í 1990-árunum, hugsaði eg ofta um at koma aftur.

Michael Boolsen, fúti, er vorðin ein álítandi klettur í koronutíðini. Sum formaður í Farsóttarnevndini er hann saman við hinum júst valdur til ársins almenna leiðara, og tá tað hevur leikað á, hevur hann verið í hvørjari stovu í landinum, har hann hevur givið føroyingum rís og rós.

Men hvør er Michael Boolsen. Tað fæst eitt innlit í, í hesi samrøðuni.

Michael Boolsen er uppvaksin á Sorø Akademi, tí pápin var lærari á kenda skúlanum og umsjónarmaður á Holbergs húsi, har nógvir føroyingar hava búð. Hann tók sjálvur studentsprógv á skúlanum, seinni gjørdist hann løgfrøðingur og ákæri. Miðskeiðis í 1990-árunum var hann í Føroyum sum fulltrúi - í djúpastu kreppu í nýggjari tíð. Og tað var hendan tíðin, sum gjørdi, at hann ynskti seg aftur til Føroya.

Fólk hava lagt til merkis, at hann frá fyrsta degi skilti føroyskt, men sjálvur heldur hann seg frá at tosa tað við onnur enn børn, tí tað ljóðar av "pommern til", sum hann málber seg.

Hóast hann sum fúti og formaður í Farsóttarnevndini er komin við ópopulerum áminningum og formaningum, so hevur hann mest sum bara møtt vælvild og góðynskjum, sigur hann.

Hoyr alla samrøðuna við Michael Boolsen her.