Um tú hevur hug til at kunna teg meira um føroyskar plantur, ella hevur hug til at síggja tað, sum veksur vilt í Føroyum, ber til at leggja leiðina fram við Kúrdali í Hoyvík, har Tjóðsavnið hevur lagt ein plantufrøðiligan urtagarð.

Gartnarin Annleyg Patursson hevur seinastu tíðina arbeitt við at fáa eina ørgrynnu av føroyskum plantum at vaksa har, og sjálvt um avbjóðingar við vindi og sjóroki kunnu spæla gróðrarlíkindunum eitt puss eru nógvar plantur, grøs og blómur at síggja.

Hetta er týdningarmikið fyri plantufrøðiliga margfeldið í Føroyum, heldur Kolbrún í Haraldstovu, savnsvørður, tí so kunnu fólk koma higar at síggja føroyskar plantur, heldur enn at taka tær úr náttúruni. Fleiri teirra eru viðbreknar og tola ikki, at fólk taka ov nógv av teimum.