- Man roynir alla tíðina at fáa tingini at ganga upp.

Hilmar Eliasen stendur sum stjóri á Strandafaraskipum Landsins ofta fyri skotum. Men hann svarar altíð sáttliga aftur, hóast kritikkrin kann vera hvassur, og hann minnir seg sjálvan á, hvat hann stendur fyri, og hvørji mál hann hevur sett sær vegna stovnin, sum hann leiðir.

Sum leiðari leggur hann seg eftir at vera autentiskur, men skundar sær at leggja afturat, at tað sikkurt ikki altíð eydnast.

Strandfaraskip Landsins hava havt ómetaligan týdning fyri land og fólk, og í meira enn eina heila øld hevur stovnurin knýtt føroyingar saman. Hetta er stjórin sera tilvitaður um, og hann heldur tað hava stóran týdning at seta eina kós, nú meginparturin av landinum er knýtt saman við veganeti. Tí Strandferðslan hevur framvegis ein stóran týdning í hesum landinum, um útoyggjunum skal vera lív lagað.

Kom við ein túr upp á brúnna í Strandferðsluni, har vit hitta stjóran og spyrja um tær síðurnar, vit sjáldan síggja. Hoyr tann meira privata Hilmar Eliasen seta orð á síni virði sum leiðari og menniskja.