"Kom bara inn, eg skal ikki gráta."

Á Finsen venja tey í hesum døgum nýggjan einrøðuleik við hesum serstaka heitinum, sum leggur upp til, at hetta er ein rættiliga persónlig søga.

Og tað er tað eisini. Jógvan Andrias Joensen er leikari, og leikurin byggir á hansara egnu upplivingar sum barn. Talan er um ein nýskrivaðan leik, sum tekur støði í eini tíð, tá ið flestu føroyskir sjúklingar vóru sendir til Danmarkar, og nemur millum annað við evnið sálarheilsa, sum er nógv frammi í dag

- Leikurin snýr seg um, at eg sum barn var sendur til Danmarkar í sambandi við sjúku. Tær upplivingarnar hava sett spor, sum hava fylgt mær alt lívið, greiðir Jógvan Andrias frá.

Hann eigur hugskotið, sum Ria Tórgarð hevur skrivað leikritið eftir, og Edvard Nyholm Debes hevur gjørt tónleikin.

Ria Tórgarð, sum eisini er leikstjóri, valdi at lata Jógvan Andrias sjálvan spæla leikin og greiða frá, heldur enn at fáa ein sjónleikara at spæla. Meira autentiskt verður tað neyvan.

Ætlanin er at fara um landið við leikinum. Byrjað verður í Havn og endað verður í heimbýnum hjá Jógvani Andriasi, Klaksvík. Leikurin verður frumsýndur í Finsen 15. september.

Hoyr samrøður frá Finsen.