- Tíðindi, mentan og ítróttur
Nón
Cazador de Ostras er spanskt og merkir tjaldur. Cazador de Ostras er samstundis heiti á nýggju heildarútgávuni hjá Teiti, tann áttanda í røðini. Og heitið í sær sjálvum lýsir rættiliga væl Teit Lassen sum listamann, tónleikara og menniskja.
Teitur er flytifuglurin, sum hevur verið heilt í Argentina, har hann hevur latið sínar sangir í eksotiskar fjaðrar. Og í aðrar mátar er hetta eisini sigandi fyri, at Teitur ikki letur seg avmarka, hvørki geografiskt ella listarliga.
- Tað tykir mær manipulerandi, um tú gert tónleik grundað á, hvussu fólk reagera. Tað virkar meira rætt at gera tað, sum bara følist ordiliga gott, og sum man sjálvur vil hoyra, sigur Teitur í hesi samrøðuni, har tosað verður um tann listarliga frælsa fuglin.
Nýggja fløgan hjá Teiti hevur tólv løg, har seks eru á enskum og seks eru á føroyskum. Áhugavert er eisini, at føroysku løgini hava ein annan meiri inniligan dám enn tey ensku, sum eru meira popput. Sagt er um fløguna, at hon er tann mest melodiskt fyrikomandi frá Teiti í fleiri ár, og Teitur er ikki ósamdur.
Hoyr áhugaverdu samrøðuna við Teit um nýggja fløguna og fá brellbitar av Cazador de Ostras.