- Tíðindi, mentan og ítróttur
Nón
Nýggja útgávan, sum Ragnar Finsson gevur út undir navninum Horrse, við heitinum Crossing, vísir ein listamann, sum er opin um sína sálarkvøl.
EP'in kemur út á Tutl Records tann 5. november og sjálvur sigur Ragnar Finsson, at hann við fløguni kemur heim til fólkatónleikin og punktónleikin samstundis.
Ragnar Finsson viðgongur, at hann hevur havt sítt at dragast við, og tað kemur eisini til sjóndar á útgávuni. Longu sum 12 ára gamal gjørdist hann kendur, tá ið hann kom langt sum lítil punkdrongur í sendingini Talent hjá DR. Honum dámdi ongantíð at gerast kendur, og tað gav baksláttur.
- Eg haldi ikki, tað er sunt fyri børn at skula í sjónvarpið, og at øll hava eina meining um tað, tú gert, sigur Ragnar.
Men tónleikurin hevði longu fingið fastatøkur í hann, og hann hevur síðan roynt seg í fleiri samanhangum við góðum úrslitum. Og nú letur hann sítt lyndi koma til sjóndar í tónleikinum.
- Eg veit ikki, um eg nakrantíð fótaði mær aftur - fyrr enn kanska beint nú.
Hjá Ragnari verður tað ongantíð aftur eitt mál at gerast kendur, men hann vil sleppa at fordjúpa og hugsavna seg í tónleikinum.
- Eg leggi so forbankað lítið í pengar. Eg vil gjarna tjena pengar, so eg kann fáa góðan mat og búgva onkustaðni, men tað týdningarmesta fyri meg er at sleppa at sita og skriva tónleik hvønn dag. At eg kann seta tíð av til tað, hevur størstan týdning fyri meg, sigur Ragnar Finsson.
Hoyr alla samrøðuna við Ragnar Finsson her.