Guðrun og Guðrun vóru ein av fýra føroyskum sniðgevarafyritøkum, ið var við á sniðgevaraátakinum í La Maison du Danemark í París um vikuskiftið.

Guðrun og Guðrun fara hesa vikuna eisini at luttaka á stórari, kendari mótamessu í París. Hetta er neyðugt fyri at fáa beinleiðis samband við týdningarmiklar kundar, sigur Guðrun Rógvadóttir, sum serliga tekur sær av marknaðarføringini hjá Guðrun og Guðrun.

Hon vísir á, at hóast klædnamarknaðurin er sera stórur og kappingin hørð, so er stórur áhugi fyri sniðgevingini hjá Guðruni og Guðruni.

"Vit hava sum oftast lutfalsliga smáar básar, men hóast hetta vekja klæðir okkara stóran ans. Serliga japanarar steðga heilt náttúrliga upp við okkara bás. Orsøkin til hetta er helst, at vit framleiða øðrvísi enn hini, og at estetikkurin í sniðgevingini og góða handverkið skína ígjøgnum", sigur Guðrun Rógvadóttir.

Hon vísir á, at stórur dentur verður lagdur á burðardyggleika í klædnaídnaðinum, og har hava Guðrun og Guðrun ein stóran fyrimun.

"Vit í Guðrun og Guðrun leggja stóran dent á burðardyggleika, men tað burðardygga er ein náttúrligur partur av føroysku ulla- og bindimentanini, so vit skulu ikki uppfinna nakað. Vit skulu bara byggja víðari á okkara siðaarv við nýmótans sniðgeving, og gerast betri til at fortelja søguna um, hvussu hetta er ein náttúrligur partur av okkara mentan" vísir Guðrun Rógvadóttir á.

Lurtið eftir prátinum við Guðruna Rógvadóttur.

Tað er ein bólkur av føroyskum sniðgevum við Sissal Kristiansen á odda, sum samskipar sniðgevaraátakið um vikuskiftið.

Sniðgevaraátakið er partur av stóra almenna mentanarátakinum "Un Éclat de soleil", sum fevnir um listaframsýning, og seinastu tvær vikurnar harumframt hevur havt føroyskan tónleik, bókmentir og film á skránni.