Høvuðsvápnið hjá Nato, ES og vesturheiminum ímóti krígnum í Ukraina eru sanktiónir mótvegis Russlandi. Tær skulu serliga raka búskapin og útlendsku pengarnar hjá oligarkum, og stilla Ukraina sterkari í friðarsamráðingum.

Og sanktiónirnar og krígsstøðan sum heild, merkjast nú millum vanlig fólk í Russlandi. Kanska serliga hjá teimum ungu, tí fleiri samskiftispallar og hentleikar, sum ung vanliga nýta, eru skerd.

Tað sigur Tór Marni Weihe, sum lesur russiskt á Lærda háskúlanum í Keypmannahavn. Hann fylgir væl við í russiskum miðlum, og hevur eisini vinfólk í Russlandi, sum eru kritisk mótvegis Putin og russisku innrásini í Ukraina.
- Fleiri luttaka í mótmælisgongum, og men tað er ikki vandaleyst, og ein vinmaður hjá mær varð handtikin og fekk bót, sigur Tór Marni Weihe, sum vandar sær um orðini, tá hann samskiftir við síni vinfólk.

Lurtið eftir samrøðuni við Tór Marna Weihe, Тор Марни Вайе, um kríggið í Ukraina og støðuna í Russlandi beint nú.