Í Føroyum hevur útróðurin havt stóran týdning, bæði búskaparliga og mentanarliga, og fleiri minnast allar útróðrarbátarnar í alskyns litum og sniðum, og alla ta livandi mentan, ið var við havnalagið, tá bátarnir landaðu og stamparnir skuldu egnast.
Men hvat er so dragandi við at rógva út í dag? Henda spurningin seta vit Carl August Arge, niðri við fiskatorgið í Vágsbotni í Havn.
Tað hevur hildnast væl hjá útróðrarflotanum farnu mánaðirnar. Vit fregnast um vísindaliga partin, tá vit hitta Petur Steingrund, deildarleiðara og fiskifrøðing ph.d., á Havstovuni.
Útróðurin hevur havt stóran týdning, men nær tekur útróðurin seg upp og eru øki, har útróðurin hevur havt serligan týdning? Hesar og aðrar spurningar seta vit Jóan Paula Joensen, professara.
Klaksvík hevur verið eitt av stóru útróðrarplássunum í Føroyum, men hvussu er støðan í dag? Vit hava verið við havnalagið í Klaksvík, har vit hittu skiparan og reiðaran á Kallanesi, Kára í Kongsstovu.
Eisini tosa vit við kranføraran Sjúrð Josephsen, egnararnar Mogens Højsted, Hans Niclasen og Søren Djurhuus, og heimaformannin á Líðhamri, Klávus Bjartalið.
Í sekstiárinum skrivar Føroya Landsstýri út kapping um at menna ein nýmótans føroyskan útróðrarbát. Vit hava spurt Óla Olsen, um hvønn týdning henda kappingin fekk fyri føroyska útróðrarflotan.
Við atgerðum og nógvum dramatikki skipaði Meginfelag Útróðrarmanna á sumri í 1975 fyri sonevnda útróðrarverkfallinum. Vit hava verið í søgusavni kringvarpsins.
Hví fara ungir menn at rógva út? Vit fregnast hjá skiparanumn umborð á Stakkavík, Andru Poulsen.