Skeivur sum ein hani

Orð og løg frá Jóan Jakku Guttesen hava í mong ár ríkað føroyska tónleikaheimin. Fáur megnar sum Jóan Jakku og hansara vinfólk í Tinganest og Vágaverk at fáa lív í fjøldina á konsertum og festivalum.

Rock'n'roll og hippierørsla í 60unum myndaðu unga gávuríka mannin úr Sørvági, sum ikki vildi vera akademikari sum vinmenninir, men setti æru í at vera proletarur. Umframt at skriva eina perlurøð av sangum, sum flestallir føroyingar duga uttanat, hevur hann arbeitt við pensli og blikki sum málari.