Í triðju og seinastu sendingini í sendirøðini Skriftstøð tosa høvundin og bókmentafrøðingurin, Kim Simonsen og Siri Ranva Hjelm Jacobsen, ið eins Kim er høvundi og kanditatur í bókmentafrøði, millum annað um rættin at lýsa eitt land við gestsins eyga. Tey tosa um mál, um at bera landslagið og støðini í sær, um kensluna av heimi, um hvørt skaldskapur og list er eitt kall, um at hava hurðar opnar til onnur lond og mentanir, um at vera føroyingur í Danmark og dani í Føroyum, um privilegiir, um støðuna hjá føroyskum bókmentum í 2017, og um hvussu tjóðskaparkensla- og rørsla eisini hava sínar skuggasíður og vansar.
Siri Ranva Hjelm Jacobsen er 36 ára gomul, og triðja ættarliðs føroyingur. Í 2015 debuteraði hon við ættarskaldsøguni, Ø, ið snýr seg um at venda aftur til eitt heim, ein aldri hevur búleikast í. Í Ø stjelur Siri við ørmun og beinum frá veruleikanum, men leggur dent á, at tó so, er talan um eina listarskaldsøgu.
Í samband við arbeiði og við útgávuna av skaldsøguni, hevði Siri mong ivamál. Millum annað var hon sera óttafull um, hvussu føroyingar fóru at taka ímóti eini danskari skaldsøgu, ið snúði seg um Føroyar og føroysk viðurskifti. Harumframt arbeiður Siri við trupuleikanum í at skilja millum mentan og mál, og við tí frástøðu, sum tað, ikki at meistra eitt mál, kann hava við sær. Eisini greiðir hon frá, hvussu hon metir og upplivir, at føroyingar og føroysk mentan verða móttikin í Danmark.
Føddur í 1970 hevur Kim Simonsen búleikast í útlandinum fleiri ár enn hann hevur búð í Føroyum. Hetta hevur merkt hann, og hevur givið honum eina aðra ballast, enn hann annars hevði haft, er hansara meting. Kim arbeiðir dagliga við hugtakinum tjóðskapur, við máli, mentan og bókmentum, og tað er úr rúminum har sosiologi og mentan hittast, at Kim tosar. Í hesi sendingi nertir hann millum mangt annað við teir vansar og tær avmarkingar, eitt kravt mál setir, um týdningin av arbeiðsfriði, av at liva uttanfyri Føroyar, av at skriva minni hátíðarligar bókmentir, um nýggjar hættir at skriva á, og um tann týdning, meir blandaður tjóðskapur hevur fyri eitt land og tess mentan, eins samband við onnur lond og mentanir og týðing av bókmentum eru av alstórum týdningi.
