- Tíðindi, mentan og ítróttur
Við Tórði á túri
Í lýsingini koma pannukøkukonurnar út í Hólm við pannukøkum og heitum kaffi og te og tað kemur væl við hjá manningini har úti. Samstundis fara menninir niður aftur á røkurnar eftir súluni, sum er dripin um náttina. Tær skulu blakast á sjógv, so báturin kann taka tær upp.
– Fyri meg hevur hesin dagurin altíð verið størsti hátíðardagur í Mykinesi, sigur 83 ára gamli Oskar Joensen, sum í mong ár stóð á odda fyri súluveiðuni. Hann fegnast um at síggja nógv ungfólk vera við á súluveiðu.
Útvarpsverturin sleppur eisini niður á rókina at blaka súlu á sjógv og at uppliva bjargalívið.
Jóhannis Danielsen, fuglafrøðingur á Havstovuni, heldur, at eftir talinum á súlustovninum verður tikið í meira lagi av grásúlu. Kortini er súlan í menning. Hann heldur at súla kemur eisini aðra staðni frá, til dømis úr Skotlandi, har størsta súlubøli í heiminum er.
Um middagsleitið kemur seksæringurin Hjalti á lendingina í Mykinesi við veiðuni, og har verður grásúlan býtt og síðani fara øll at hagreiða. Útvarpsverturin slapp at smakka steikta súlu og hon smakkaði sera væl.
Fólkini, ið eru við í hesari seinnu sendingini úr Mykineshólmi, eru hesi: Finn Hansen, Anna Gaardlykke, Jensia Gaardlykke, Ingi Jørleif Ole-Jacobsen, Marit Johansdóttir Magnussen, Hans Michael Johannesen, Esbern í Eyðansstovu, Oskar Joensen, Jórun Elisdóttir Wang, Poul Andrias Ziska, Hilmar Joensen, Jóhannis Danielsen, Elias Næs, Vivi Wang, Óli Niclasen og Laila Jacobsen.