Virkið á Stongunum hevði upprunaliga navnið Klaksvíkar Hermetikk. Men millum fólk varð tað bara rópt Bollafabrikkin. Hetta var eitt slóðbrótandi virki, sum byrjaði sítt virksemi í fjørutitiárunum og tað helt fram til 1970. Tey seinastu árini var virksemið tó minni. 

Í hesari sending hitta vit stjóran á Bollafabrikkini, John Høj, sum nú er 91 ára gamal, og hann greiðir frá hugskotum og arbeiðsgongdum. Virksemið var ógviliga umfatandi og tey løgdu bæði fisk, fugl og grind í blikk og tað mesta varð útflutt. John sigur, at tey høvdu egnar uppskriftir, sum framvegis ikki eru almennar.

Sólva Olsen, Sølva Joensen og Súlberg Klakkstein, sum vóru ung og arbeiddu á Bollafabrikkini, siga frá ymiskum upplivingum frá tíðini á virkinum.

Jógvan við Keldu, fyrrverandi borgarstjóri og løgtingsmaður, arbeiddi sum ungur á Bollafabrikkini. Hann hevur síðani havt serligan áhuga fyri hesum virksemi og hevur skrivað nógvar greinar um Klaksvíkar Hermetikk. Jógvan heitir samstundis á Klaksvíkar Kommunu og fólk um at nevna virkið tað veruliga navnið, Klaksvíkar Hermetikk og ikki Bollafabrikkina.

Í egningarskúri í kjallarahæddini á Bollafabrikkini hitta vit Alfred Eliasen og Jóannes Mikkelsen, ið hava bát og egningarskúr her. Bollafabrikkin er aftur blivin aktuell, tí Klaksvíkar Kommuna og teir, sum eiga egningarskúrarnar, júst hava undirskrivað eina avtalu. Avtalan ber í sær, at teir 15 egningarskúrarnir við frystigoymslu halda fram í kjallarahæddini, og at kommunan fær ræðisrættin yvir teimum ovaru hæddunum og kann brúka hølini til okkurt spennandi endamál. Enn er ikki komið fram um hvat tað er. Eftir avtaluni átekur Klaksvíkar Kommuna sær at seta bygningin í upprunaligan stand. 

So við í sendingini eru hesi fólk: John Høj, Jóannes Mikkelsen, Alfred Eliasen, Sólva Olsen, Sølva Joensen, Jógvan við Keldu og Súlberg Klakkstein.