- Tíðindi, mentan og ítróttur
Við Tórði á túri
Húsini í Tróndargøtu standa øll eftir einari linju báðumegin gøtuna. Hóast gøtan er í hjartanum í Havn, er friðaligt har, serliga í tí niðasta partinum. Har er vegurin smalur og eingin gjøgnumkoyring. Tá tú stendur niðast og hyggur niðaneftir gøtuni, trónar katólska kirkjan ovast og tað sær út sum gøtan endar har, sjálvt um Varðagøta fer niðaneftir framvið gomlu kirkju.
Viggo Christiansen vaks upp í Tróndargøtu, og í sendingini greiðir hann frá ymiskum viðurskiftum í Tróndargøtu. Hann keypti eini gomul hús frá abbanum, Johan Poulsen, og tók tey niður, tí tey vóru sera vánalig. Nýggj hús vórðu síðani bygd á stykkið og familjan flutti inn í 1982. Her er sera gott at búgva, sigur Viggo Christiansen.
Barbara Árnadóttir Jakobsen trívist avbera væl í hjartanum í Havn. Hon sigur, at her er veðurgott og eisini friðaligt, hóast tað er mitt í býnum. Tá stórar konsertir eru niðri á Vaglinum og í Vágsbotni, kann hon bara lata vindeygað upp og so er hon við á konsert.
Vit vitja eisini í Fótbúna, sum síðani 1955 hevur verið á horninum Tróndargøtu og Sverrisgøtu. Hjúnini Súsan og Bjarni Joensen eru triðja ættarlið, sum rekur skógvahandilin. Og millum skógvarnar á aðru hædd vísir Bjarni okkum hvar hann varð føddur, á stovuborðinum hjá ommuni. Súsan sigur, at koronasmittan hevur ávirkað skógvaídnaðin, tí mótarnir skifta ikki so ofta sum vanligt hevur verið.
Lív Jacobsen hevur nógv góð minnir frá Køkubúðini, sum var ein miðstøð í Havn, á horninum Tróndargøtu og Niels Winthersgøtu. Annefía og Andrias Jacobsen, foreldrini hjá Lív, róku Køkubúðina, og øll kendu navnið Andrias í Køkubúðini. Lív minnist hvussu væl mamman og pápin arbeiddu saman. Pápin var tann framfýsni og tók skjótar avgerðir, og mamman var tann stilla, sum gjørdi uppgávurnar aftanfyri.
Bygningurin hjá Køkubúðini verður leigaður út til ymisk endamál. M.a. eru tvær kristiligar útvarpsstøðir har, Sjey og Radio.fo. Tór Arni Samuelsen á útvarpsstøðini Sjey sigur, at endamálið er at bera føroyingum tann góða boðskapin.
Í Tróndargøtu 18 hevur leirvíkingurin Sverri Heinesen búð síðani miðskeiðis í áttatiárunum. Hóast hann hevur gjørt nógv við húsini, hevur Sverri lagt stóran dent á at tey skulu vera óbroytt frá upprunaligu útsjóndini. Sverri sigur, at trappan út á vegin fer ongan veg, tí hon avmarkar nógv ferðina hjá bilum, sum koma oman í henda partin av Tróndargøtu. Hesi ráðini fekk hann frá Gunnari Hoydal, sála, sum tá var býarverkfrøðingur. Eini góð ráð, heldur Sverri.