- Tíðindi, mentan og ítróttur
Við Tórði á túri
Jóhannus Kallsgarð, bóndi á Trøllanesi, hevur nógv jørn í eldinum. Í fjør festi hann tveir garðar á Trøllanesi, bæði ættargarðin Innistovu og festið í Útistovu, og hann ger nógv burtur úr seyðinum. Hann hevur nú 330 áseyðir, og alt verður fóðrað hesa tíðina av árinum, nú lembingin stendur fyri durum.
Samstundis hevur ungi bóndin stórar ætlanir í sambandi við ferðavinnuna. Sum kunnugt varð ein partur av nýggja James Bond-filminum tikin upp úti á Kallinum, har Jóhannus hevði leiklutin sum samskipari fyri øllum tí praktiska í sambandi við upptøkurnar. Nú er eisini ein gravsteinur yvir James Bond reistur á Kallinum, og hann hevur fingið nógva umtalu víða um. Nú fyrireikar bóndin seg til stóra innrás í summar, og ætlanin er at skipa fyri serligum James Bond-túrum. Ein nýggj gøta skal eisini gerast av Trøllanesi og út á Kallin, og fyri útlendingar og vinnurekandi fer tað at kosta at fara út á Kallin.
Unga bóndakonan Eva Fimmbogadóttir Kallsgarð hevur hvørki fingist við seyðahald ella ferðavinnu, men hon sigur, at hon er farin inn í uppgávuna við opnum sinni. M.a. stóð hon fyri øllum tí húsliga, tá flettingin var í heyst. Men hon sigur, at hon fekk nógva og góða hjálp, serliga frá familju. Um stutta tíð ætla ungu bóndahjúnini at fara at gera matpakkar til ferðafólk.
Hjúnini Maud og Bárður Østerø í Útistovu. Bárður Østerø í Útistovu hevur verið bóndi í mong ár og hevur havt bæði neyt og seyð. Men nú hevur hann latið festið frá sær til Jóhannus Kallsgarð. Eftir at sonurin, Páll, datt oman og doyði tá teir vóru á fjalli vestanfyri 2018, hevur Bárður mist hugin. Hann hevur eisini selt mjólkakvotuna, so nú koyrir hann buss fyri Bygdaleiðir í Kalsoynni. Konan, Maud Østerø, arbeiðir í Bónus í Klaksvík, og harafturat hevur hon kioskina á Trøllanesi, Hon sigur, at útlendingar eru serliga glaðir fyri lokala vøru, og hon ger sjálv ymist, m.a. pylsur og rabarbusyltitøj.
Ómetaliga nógv er broytt síðani gamla bóndakonan, Gertrud Joensen, kom av Syðradali norður til Trøllanesar. Hon heldur, at SEV hevur verið størsta broytingin. Tunnilin hevur sjálvsagt eisini broytt nógv, men Gertrud fírdi ikki fyri at ganga heilt til Syðradals.
Høgni Reistrup, sum hevur felagið "Guide to Faroe Islands", hevur saman við Jóhannusi Kallsgarð bónda tikið stig til at reisa gravsteinin yvir James Bond. Høgni ivast ikki í, at gravsteinurin fer at draga upp aftur fleiri fólk hendavegin, serliga Bond-fjepparar og teir eru nógvir. Hetta er einasta stað í heiminum, at James Bond er deyður í filmi.
Jógvan Thomsen, havnarmaður sum býr í Kirkjubø, er bæði James Bond-fjeppari og ferðasmiður. Hann sigur, at eftir nýggja filmin og nú gravsteinurin á Kallinum eisini er reistur, koma nógvir fyrispurningar alla staðni úr heiminum. Hann væntar, at tað koma fleiri túsund fólk til Føroya um árið fyri at sleppa út á Kallin, tí James Bond var har og doyði har.