Hjúnini Hensia Einarson og Finn Jespersen, sum hava búð í Havn í mong ár, keyptu hús í Aakirkeby á Bornholm, har tey nú hava búð í fimm ár. Hensia er blivin pensiónistur og hon sigur, at Aakirkeby er væl egnaður býur at blíva gamal í. Finn, sum vaks upp í Aakirkeby, arbeiðir á havnarlagnum í Rønne, har hann koyrir traylarar í sambandi við farmaflutningin til og úr oynni. Føroyingar á Bornholm savnast javnan heima hjá Hensiu og Finn og ofta eta tey føroyskan mat.

Finn Jespersen greiðir frá, at í mong ár vóru jarnbreytir á Bornholm og tok bundu býirnar í oynni saman. Í dag eru súkklubreytir nógva staðni har jarnbreytin var, men flestu tokstøðirnar eru kortini varðveittar.

Fólkatalið á Bornholm er støðugt minkað og í dag búgva sløk 40.000 fólk í oynni. Borgarstjórin, Jacob Trøst, sigur, at visiónin er at fólkatalið í framtíðini skal verða í minsta lagi 42.000. Hóast nógv umtalaðu spreingingina í sambandi við Nord Stream-kaðalin herfyri, óttast borgarstjórin ikki, hóast kaðalin er tætt við oynna.-Vit eru limir í NATO og eg havi fult álit á at verjusamgongan verjir okkum, sigur borgarstjórin.

Á havnarlagnum í Nexø hitta vit skálvíkingin Ragnar Jacobsen. Hann kom til Bornholm í 1983 og tá var sera stórt fiskavirksemi á havnarlagnum í Nexø. Nógv skip og nógv arbeiði uppi á landi. Nú eru bara stuttleikabátar her og eingin fiskur er í Eystursjónum longur, og í gomlu fiskavirkjunum eru nú handlar og matstovur.

Froðbingurin Marlo Prasad flutti til Bornholm av Sælandi í fjør og nú búgva tey í lítla býnum Tejn. Hann sigur, at hann hevur longst illa heim til Føroya, men tað riggaði ikki í sambandi við familjuna at flyta heimaftur. Men Bornholm er eitt gott alternativ, sigur Marlo. Hann býr tætt við sjógvin og hann kann fylgja við stóru fiskikappingini, sum einaferð um árið er í Tejn, tá nógvir hundrað bátar ymsa staðni úr heiminum koma higar at kappast.

Heidi Johannesen úr Miðvági hevur búð størra partin av lívinum á Bornholm. Hon kom higar saman við manninum Jógvan Suna, sum fiskaði í Eystursjónum. Í dag arbeiðir Heidi við truplum børnum í kommununi. -Eg trívist sera væl her. Men eitt keðiligt er at alt steingir um veturin, tá ferðafólkini ikki eru í oynni. Mær dámar sera væl at koma saman við øðrum føroyingum, at tosa føroyskt og eta føroyskan mat.. Hensia er ófør at samla okkum, sigur Heidi Johannesen.