Til dømis vil ein samanseting við nógvum børnum og ungum hava við sær, at neyðugt er at hava nógvar vøggustovur, barnagarðar, fólkaskúlar, miðnámsskúlar og tílíkt. Á sama hátt vil ein samanseting við nógvum eldri fólki hava við sær, at neyðugt er at byggja sambýli, ellisheim, røktarheim, heimahjálp og so framvegis.

Samansetingin av fólkinum hevur tískil ikki einans týdning fyri sosiala lívið í økinum, men eins stóran týdning fyri búskapin, fíggjarlógina, vinnuna og annars raksturin av landinum.

Fólkatalsfrøði, demografi, er læran um, hvussu fólka-mongdin broytist gjøgnum tíðina. Her verður hugt eftir støddini, bygnaðinum og býtinum av fólkamongdini, og hvussu fólkamongdin broytist gjøgnum tíðina av føddum, deyðum, fluttum og av at folk gerast eldri.

Fólkatalsfrøðiligar greiningar kunnu fevna um samlaða fólkið ella um bólkar út frá ymsum ásetingum - til dømis útbúgving, tjóðskap, átrúnaði og uppruna.

Í hesi sending verða nøkur av demografisku hugtøkunum umrødd, sum hava týdning, tá ið hugt verður eftir eini fólkamongd.

Hvussu gongdin hevur verið í Føroyum innan fólkatal, fødd, deyð og flytingum til og úr Føroyum.

Magni Laksáfoss, búskaparfrøðingur, hevur skrivað eitt fólkatalsfrøðisligt rit um fólkatalið í Føroyum frá ár 1700 til ár 2100.

Ì sendingini verður tosað við Magna um evnið.