Varðhaldsfongslaður fyri at seta eld á

Ein 42 ára gamal maður varð í grundlógaravhoyring í dag varðhaldsfongslaður í fýra vikur fyri eldáseting. Tað var í gjár, at maðurin royndi at seta eld á ein bil hjá Tórshavnar kommunu. Tilburðurin fór fram á parkeringsplássinum á Frúutrøð við nakrar arbeiðsskúrar hjá Tórshavnar kommunu. 

 

Maðurin fór inn í handilin Mylnuna, har hann keypti reinsibensin, sum hann í brúkti til at seta eld á,. Ein troyggja lá á baksetrinum í einum bili, hann stoytti nakað av bensininum á troyggjuna og setrið, og fór síðani til hús. 

 

Fólk hjá Tórshavnar kommunu kom til beinanvegin, og tað eydnaðist teimum at sløkkja eldin, áðrenn hann rættiliga festi í bilin. 

 

 

42 ára gamli maðurin greiddi í grundlógaravhoyringini frá, at hann misti starvið hjá sær hjá Tórshavnar kommunu í 2010, og hevur verið arbeiðsleysur síðani. Harafturat hevur maðurin fyri stuttum fingið at vita, at hann er uppsagdur í bústaði sínum.

 

- Eg var so ørkymlaður um, at eg eri arbeiðsleysur enn, og nú eisini verði heimleysur. Eg eri púra fyri av ongum av støðuni hjá mær, segði skuldsetti í rættinum, og hann legði afturat, at tann, sum hevur skyldina av hesi støðuni, er Tórshavnar kommuna. 

 

Og tí royndi hann at seta eld á bilin. 

 

 

Dómarin metti, at vandi kann vera fyri, at skuldsetti fer at gera líknandi brotsgerðir aftur, og tí varðhaldsfongslaði hann tann 42 ára gamla mannin í fýra vikur. 

 

- Orsøkin til, at fongslingin er fýra vikur, er, at vit hava ikki stundir avgreiða málið skjótari, segði dómarin við skuldsetta, sum tók við varðhaldsfongslingini. 

 

Kriminalforsorgin fer eisini at persónskanna mannin.