Vánaliga støðan á bústaðarmarknaðinum gongur út yvir fólkaheilsuna, serliga hjá teimum ungu, staðfestir stóra fólkaheilsukanningin. Men hvat ætla politikararnir at gera við tað? Elsebeth Mercedis Gunnleygsdóttir, landsstýriskvinna í bústaðarmálum, og Tróndur Sigurðsson, komandi formaður í Byggi- & Býarskipanarnevndini í Tórshavnar Býráð, kjakast um evnið.

Oftari og oftari hoyra vit um hørðu rúsevnini, sum floyma úr útlandinum inn í føroyska samfelgið. Men nú verða hørðu rúsevnini eisini framleidd í Føroyum. Vit tosa við Jan Johannesen, leiðara á narkodeildini hjá politinum.

Ragnar Joensen fer nú at ala laks á landi í Kina - síðst í sendingini hava vit eina longri samrøðu við føroyska alaran.

Men fyrst í sendingini fara vit í løgtingið. Er tað nóg mikið at stongja náttarlívið, um korona aftur fer at gera um seg? Tann spurningurin verður umrøddur í Vinnunevndini, sum hevur sent boð eftir landsstýrismanninum í heilsumálum..

Sendingina gjørdu: Barbara Holm, Hallur av Rana og Jón Brian Hvidtfeldt, sum eisini var redaktørur.