Parkeringsviðurskiftini í miðbýnum í Havn eru alt annað enn góð.

Tað halda fólk, sum búgva í miðbýnum, og í gjárkvøldið varð skipað fyri einum borgarafundi, har parkeringsviðurskiftini hjá teimum, sum búgva ella hava handilsvirksemi í miðbýnum, blivu umrødd.

Mena Joensen, sum býr undir Glaðsheyggi í Havn, var við á fundinum í gjárkvøldið, har serliga trý evni vóru á breddanum.

- Ein trupulleiki er, at fólk, ið reka fyritøku í miðbýnum, meta, at tey missa inntøku, av tí at kundar fáa ikki parkeringspláss og velja tí at fara aðrastaðni.

Vit, sum búgva í miðbýnum, hava trupulleikar av, at vit hvønn tíma noyðast at fara út í bilin at stilla p-skivuna, tí tað er bara loyvt at hava bilin standandi í ein tíma.

Og so eru tað tey, sum búgva uttan fyri sonuna, men sum ikki hava parkeringspláss, tí tað verður brúkt av eitt nú starvsfólkum í SMS og so framvegis, sigur Mena Joensen.

Sum skilst ætlar Tórshavnar kommuna at geva serliga parkeringsloyvi til eini 60 húski, sum búgva í miðbýnum, soleiðis at tey ikki fáa bøtur, men tað loysir ikki allan trupulleikan, heldur Mena Joensen.

- Tað mangla framvegis parkeringspláss í miðbýnum, og tað er ein trupulleiki, sigur Mena Joensen.