Seinastu trý árini hava fleiri ymisk fólk í Sunda kommunu arbeitt við at menna eitt talgilt kort við staðarnøvnum og gomlu bygdargøtunum í kommununi.

Noomi K. Rasmussen hevur verið leiðari fyri stóru og umfatandi verkætlanini, sum hevur kravt nógva tíð og orku.

- Við hesum kortinum eru allir upplýsingar um staðarnøvn og bygdargøtur savnaðir á einum stað. Ætlanin er, at fólk skulu brúka kortið, tá tey vilja hava upplýsingar um okkurt ávíst stað í kommununi og kunna seg um gongutúrar eftir gomlu bygdargøtunum, sigur Noomi K. Rasmussen.

Ein, sum hevur verið við til at savna inn upplýsingar um staðarnøvnini, er Asfinn Sigvardsen. Longu fyri 30 árum síðani byrjaði hann at skriva staðarnøvn niður, men ikki fyrr enn nú kunnu tey veruliga verið til gleði og gagns fyri onnur.

- Eg havi fyrst og fremst savnað tilfarð inn um staðarnøvnini við Gjógv, og har havi eg so prátað við ymisk heimildarfólk, sum jú vita eina rúgvu, sigur Asfinn Sigvardsen, ið fegnast um nýggja, talgilda kortið.

- Á henda hátt verður vitanin varðveitt, og eg ímyndi mær, at eitt nú skúlaflokkar og gongufólk kunnu fáa nógva gleði av kortinum, sigur Asfinn Sigvardsen.