- Tíðindi, mentan og ítróttur
Góðan morgun Føroyar
Benajmin Rasmussen sigur, at hann visti, at talan var um ein heilt sjáldsaman møguleika.
Vanliga eru tað somu fotografar, sum avmynda amerikanska forsetan, og aloftast bara á skrivstovuni, the Oval Office.
At sleppa inn, har forsetin býr, og brúka eitt kvøld saman við honum har, er rættiliga óvanligt.
8. mai fingu tey loksins grønt ljós, og tá fór hann, saman við starvsfólki hjá Time, í Hvítu húsini.
Tá trygdartiltøkini vóru avgreidd, vórðu tey leidd inn á aðra skrivstovu.
Trump heilsaði upp á øll, og tendraði síðani sjónvarpið.
Í 20 minuttir vísti hann teimum brot úr hoyring í Senatinum.
Um somu tíð gav hann journalistunum sínar tolkingar av tí, sum var borið fram í Senatinum.
Hvat hann vildi við hesum, veldst um eygað, sum sær, men helst var tað ein máti at taka stýringina og fáa sín boðskap út.
Sum menniskja er hann ógvuliga samansettur, sigur Benjamin Rasmussen.
Hann hevur verið í almenna rúminum so leingi, at hann veit júst, hvussu hann skal vera, tá myndafólk eru í nánd.
Trump er óformellur, mest sum ov vildi onkur hildið, og populistiskur, men eisini høviskur og innbjóðandi.
Í alt var Benjamin Rasmussen í Hvítu húsunum í tríggjar tímar, men bara fáir minuttir vóru til at taka myndirnar.
Starvsfólk í umsitingini vóru alla tíð um tey og søgdu hvar var loyvt, og serliga hvar ikki var loyvt, at taka myndir.
Ljósið og umstøðurnar inni vóru sera vánaligar, og tí brúkti hann fyri tað mesta eitt myndatól, sum var lætt og skjótt at arbeiða við.
Úr myndarøðini var bara ein mynd, sum skuldi skuldi góðkennast, áðrenn hon kom í Time.
Orsøkin var, at andlitið á Trump speglaðist í eini hurð, og at hann tí vísti seg frá eini síðu, sum ikki var uppsett og tilgjørd eins og á hinum myndunum.
Benjamin Rasmussen hevur tikið fleiri aðrar myndarøðir, og hann dugir illa at siga, hvør teirra hevur størstan týdning.
- Tá ein verkætlan er liðug, er tað týdningarmesta, tað, sum kemur næst, sigur Benjamin Rasmussen at enda.