Fyri fimm árum síðani stovnaðu Ottar í Hjøllum og ein vinmaður á Copenhagen Business School fyritøkuna Snowminds.

Tað var teirra felags áhugi fyri at standa á skíð, sum var íblásturin til felagið, sum hevur til endamáls at útbúgva skíðlærarar.

Hugskotið hevur nú ment seg til lønandi vinnu, og í fjør vórðu 450 skíðlærarar útbúnir og fingu starv.

Í grundini er Snowminds í dag heimsins størsta fyritøka av sínum slagi.

Eisini hava vinmenninir báðir sett onnur feløg á stovn, sum øll hava okkurt við tað at standa á skíð at gera. 

Ottar í Hjøllum hevur framløgu á tiltakinum Markleys útbúgving í Norðurlandahúsinum hósdagin..

Markleys útbúgving er í ár serliga ætlað teimum, sum ganga á síðsta ári á gymnasiala miðnámi. Men øll áhugað hava ókeypis atgongd uttan tilmelding frá klokkan 10.15 til 15.