3 tímar, 10 minuttir og 42 sekund.

Soleiðis ljóðaði tíðin hjá 46 ára gomlu Beintu Hoydal Joensen, tá hon sunnudagin rann sítt 8. maraton í Odense.

Tíðin var so mikið góð, at hon setti persónligt met.

- Í flogfarinum niður til Danmarkar lovaði eg, at hetta fór at verða mítt seinasta maraton, men longu nú veit eg, at eg fari at renna eitt maraton í vár, sigur Beinta Hoydal Joensen.

Renningin fyllir nógv, og hon venur seks dagar hvørja viku. harafturat er hon eisini sera tilvitað um matin, hon etur.

- Eitt nú eri eg givin við at drekka vanliga mjólk og eta mjólkaúrdráttir. Eg havi í fleiri ár havt eitt slag av astmu, tá eg renni, men síðani eg gavst við mjólkini, merki eg einki til tann trupulleikan, sigur Beinta Hoydal Joensen.

Í morgunsendingini fortaldi hon um millum annað upplivingarnar, hon hevur havt í sambandi við maratonkappingarnar, hon hevur luttikið í, og hvussu gerandisdagurin er, tá mann venur til maraton.