- Tíðindi, mentan og ítróttur
Góðan morgun Føroyar
Í dag er 14. november, og tað er altjóða dagur fyri diabetis.
Avgjørt er, at fokus í ár skal setast á kvinnur við diabetis.
Guðrið Reinert Joensen hevur livað við diabetis týpu 1, síðani hon var 16 ára gomul.
- Tað var ógvuliga kollveltandi at fáa at vita sum 16 ára gomul, at eg havi hesa sjúkuna, og sjúkan hevur verið ein avbjóðing líka síðani, hóast eg í dag dugi betur at handfara teir ymisku avbjóðingarnar, sum kunnu stinga seg upp, sigur Guðrið Reinert Joensen.
Eitt, sum fyllir rættiliga nógv hjá Guðrið, er, at fólk eru so óvitandi um sjúkuna.
- Fólk seta ofta løgnar og óbehagiligar spurningar, men tað er sjálvandi tí, at tey ikki vita, hvat tað vil siga at hava diabetis, sigur Guðrið Reinert Joensen.
Í morgunsendingini vóru hon og forkvinnan í felagnum, May-Britt Skorðadal, og greiddu frá.