Desember nærkast, jólagávur skulu keypast, og tað eru nógv tiltøk at fara til.

Fyri nógvar familjur merkir tað, at fíggjarætlanin lættliga kann fara av kós í jólamánaðinum.

- Vit vita ikki, júst hvussu nógvar pengar føroyingar brúka í desember, men vit síggja heilt klárt, at fólk brúka sjálvandi pengar upp á jólagávur, men ein stórur partur av pengunum fer eisini til mat, tí vit gera meira burtur úr matinum heima við hús í jólamánaðinum, og fara vit út til okkurt tiltak, verður onkur matur eisini keyptur.

Tað sigur Alice Frederiksberg, sum er kundaráðgevi í Betri Banka.

Sambært henni er tað eitt gott hugskot, at leggja eina fíggjarætlan fyri desember.

- Eisini er tað fyri summi eitt gott hugskot at taka reiðan pening út heldur enn at brúka gjaldskort, tí tá kann tað vera lættari at fylgja við í, hvussu nógvur peningur verður brúktur, tí tú sært heilt ítøkiliga, at peningur verður brúktur, sigur Alice Frederiksberg.

Í morgunsendingini gav hon góð ráð í sambandi við fýggjarviðurskifti og desember.